حاولت أفكر علشان أوصل لاستنتاجات لأسباب التوترات المتكررة اللي بتحصل في مصر ، وتوصلت ليها من خلال مراجعة أكثر من واقعة وكان آخرها أحداث 9 اكتوبر في ماسبيرو ، لقيت إن التسلسل اللي بيحصل بيكون منظم ومدروس بعناية لإشاعة الفوضى والضحايا بيكونوا في كل الأطراف ، الجيش والشرطة والشعب ، معظمهم بيكون من الأبرياء وبعضهم ممكن يكون من المتواطئين نفسهم.
وده بيأكد فرضية وجود عملاء وخونة مجهولين أو حتى معروفين في محاور الاحتكاك الثلاثة المحتملين (الجيش - الشرطة - الشعب) ، فمش معقول ولا منطقي إن كل الأحداث دي تحصل والأجهزة الأمنية معندهاش أدنى فكرة مين وراها ! ، سواء أمن الدولة أو الداخلية أو المخابرات أو القوات المسلحة. الملاحظ دايماً ان أي مسيرة أو مظاهرة سلمية تهدف لإسقاط شخصية معينة أو سياسة معينة تبع النظام الفاسد المحتمل اللي يكون بيحصل كالآتي :
1- في جهات منظمة مسئولة عن انها تنشر الخراب والفساد في البلد سواء من الداخلية، أو من أمن الدولة ، أو من الجيش أو المخابرات أو من رجال أعمال وأصحاب النفوذ أو المنتفعين من وجود نظام مبارك أو كل الجهات دي مع بعض ، ومحتمل جداً يكونوا مدعومين وممولين من دول ليها مصلحة في تدمير وتفتيت مصر "على رأسهم إسرائيل وأمريكا" وبينفذوا مخططاتهم ، ودول سياستهم بتعتمد على رصد ودراسة الحالة العامة للبلد ، زي الحالة الاقتصادية والأمنية والسياسية والنفسية وغيرها ، وإيه اللي الناس بيكرهوه وإيه طموحاتهم ، وأحلامهم .. إلخ.
من ضمن الأمور اللي بيدرسوها المظاهرة من بداية إنشائها أو الدعوة ليها والأعداد المحتمل انها تتواجد فيها ومقارنتها بالتقارير السابقة للحالة العامة للناس والبلد ومدى إمكانية تزايد الأعداد للمسيرة أو عدم الاهتمام بيها أساساً.
2- دراسة توزيع المتظاهرين والمساحة اللي بتغطيها المسيرة سواء كانت ميدان أو ساحة أو أكتر ودراسة طبيعة المتظاهرين هل هم مثقفين أم سكان عشوائيات أم موظفين هل هم موظفين أم شباب وطبيعة مطالبهم وهل بتهدد مصالح شخصيات أو سياسات من النظام السابق وهل المسيرة ليها لجان شعبية تأمنها وللا لأ
3- بيتم تجهيز البلطجية أوالمندسين الل المفترض يدخلوا في وسط المتظاهرين بالأسلحة أو الملووتوف وخلافه "طبعاً بعد إخفائها بطريقة أو بأخرى سواء كانت أسلحة نارية أو أسلحة بيضاء.
4- بيتم تحديد الكيفية أو الطريقة اللي هيدخل بيها البلطجية أو المندسين بين الناس من غير ما يحسوا علشان يبدأو المشاكل، سواء كان توقيت دخولهم في بداية المسيرة أو أثنائها أو حتى بعد اكتمال التجمع بتاعتها ، وده بيتحدد على أساس طبيعة وثقافة المتظاهرين والدخلة المناسبة اللي هيدخلوا بيها بينهم، فطبعا مسيرة بينظمها الموظفين غير اللي بينظمها سكان العشوائيات غير اللي بينظمها الطلبة غير اللي بتجمع كل دول مع بعض .. إلخ
وطبعاً عملية مراقبة المظاهرة وتحديد الأهداف وده على فرض وجود عناصر من القناصة المأجورين اللي بيستنوا فوق أسطح البيوت ، بالإضافة لمواقع كل عنصر من العناصر المندسة ، سواء من أعلى أسطح المنازل أو من خلال البلكونات أو بالاتصال باللاسلكي أو بأجهزة المحمول.
غير كده هم بيكونوا مراقبين ومحددين ما إذا كانت المسيرة أو التظاهرة مؤمنة بلجان شعبية مسئولة عن تنظيمها وتأمينها وبتفتش الناس اللي داخلة واللي خارجة وللا لأ.
5- معروف إن المتظاهر وخصوصاً من الشعب المصري بمجرد ما يسمع صوت شخص أوناس بتزعق أو بتتخانق بيتجمع وبينسى المظاهرة وكل حاجة عشان يروح يشوف في إيه بيحصل ويقدم المساعدة إن أمكن ، ودي اللحظة اللي بيكون انتباه الناس كله مشدود وعايزين يعرفوا في إيه ، وبالتالي دي بتبقى أنسب فرصة لتشتيت المتظاهرين أو تقسيمهم ونشر الإشاعات والأكاذيب اللي بتوقع الناس في بعضيها.
وبالتأكيد الإشاعات والأكاذيب بتتناسب مع طبيعة المسيرة وأهدافها ، سواء سياسية وللا اجتماعية وللا مطالب معينة ، وتتناسب مع مستوى ثقافة وطبيعة الفئة بتاعت المتظاهرين سواء موظفين أو طلبة أو عمال أو غيرهم ، وبيكون في أكتر من شخص مندس بيأكد على الإشاعة أو الكذبة ،
على سبيل المثال الإشاعات اللي بتثير الناس ممكن تكون :
- إلحقوا ده في واحد مسيحي ضرب واحد على دماغه وفتحها
- ده بيقولك في سلفيين معاهم سنج ومولوتوف جايين على هنا دلوقتي
- إلحقوا ده الوزير الفلاني بيقول إن مطالبكم مش هتتنفذ وبيقول كذا وكذا
- إلحقوا ده عربية الجيش داست على واحد وفرمته
- يا جماعة ده في مسيحيين هيحرقوا المصحف في الميدان
- أخويا انضرب بالنار يا ولاد الكلب ، أبن عمي اتقتل يا سفله ..
- إلحقوا ده حصل .. وحصل .. وحصل ......
* طبعاً دي جمل ساذجة على سبيل المثال لكن في جمل تانية واقعها على الشخص بيكون أشد ومؤثر أكتر من كده على حسب مدى إنفعال الناس للإشاعة.
6- طبعاً لابد من معرفة رد فعل الناس على الإشاعة وهل في استجابة وللا لأ ؟ ، وعلى أساسها بيتم تسخين الناس كلهم على كذبة واحدة ومحاولة تشتيتهم لجبهتين أو أكثر وكل جبهة فيهم مقتنعة بكذبه معينة.
على سبيل المثال جمل من ضمن أساليب التسخين :
- يا جماعة احنا مش لازم نسكت على الكلام ده لازم ناخد موقف
- يا جماعة احنا رجالة مش شوية مقاطف
- يا جماعة الجيش محاصر المكان ومانع أي حد يعدي واللي هيعدي هيضرب بالنار ، أنا رايح حد هييجي معايا ؟
- يا جماعة أنا شوفت "مسيحيين" أو "سلفيين" محاصرين الشارع ومعاهم سلاح واللي بيعدي بيموتوه ، أنا شوفت واحد مرمي سايح في دمه هنقف ساكتين وللا ايه ؟
7- مرحلة الإستنجاد بالآخرين وده بإن الناس تتصل بأهاليهم أو بصحابهم يبلغوهم إن الوضع سيئ في المكان اللي هم فيه ، وتتنقل أخبار غلط وإشاعات لناس تانيين من الإشاعات اللي فاتت دي ، وده بيدفع بأعداد جديدة من الناس المشحونين ، سواء جايين علشان يساندوا أو يحرروا المحاصرين.
8- افتعال المشاكل وده خلال طريقتين:
الأول : القيام بعملية قتل فعلاً وقت المظاهرة، سواء لأحد أفراد الشعب أو الجيش أو الشرطة ، وتنسب لقاتل ينتمي لمجموعة معينة من المتظاهرين علشان المظاهرة أو المسيرة تتحول لكتلة مشتعلة من الغضب تدمر نفسها بنفسها وتدمر غيرها بسبب الغضب ، وممكن تتحول لكتلتين أو أكثر طبعاً ، وده بيرجع للحبكة بتاعت الكذبة أو الإشاعة.
الثاني : إفتعال الخناقات أوالوقيعة بين الناس وبعضها أو بين الناس والجيش أو بين الناس والشرطة زي الطوب والمولوتوف وتخريب ممتلكات الناس علشان تتحول لفوضى وتفقد المسيرة سلميتها ويتاخد انطباع عن المظاهرات انها سبب خراب البلد والتوتر ، بالإضافة لضمان عدم تحقيق أهداف المظاهرة أو المسيرة واستمرار الشخص أوالسياسة الفاسدة اللي المسيرة خرجت عشان تطالب بتغييرها ..
التسلسل ده بيحصل في 80% من المسيرات والمظاهرات اللي حصلت خلال الفترة اللي فاتت بعد الثورة على سبيل المثال أحداث العباسية وأحداث امبابة وأحداث مسرح البالون وأحداث السفارة الإسرائيلية وغيرهم ، وبغض النظر عن نظرية المؤامرة ، فده يأكد إن الموضوع مدبر بنسبة 100% سواء من أتباع نظام مبارك أو من أمن الدولة أو الشرطة أو الحزب الوطني أو رجال أعمال أو غيرهم
العجيبة إن نفس الأحداث كلها بتحصل بنفس المنهج والآلية والتسلسل مع اختلافات بسيطة ، والأعجب إن الناس بتنساق وراء الأحداث ومبتشغلش عقلها وتحط إحتمالية إن أي تجاوزات أو مشاكل تحصل في مسيراتهم ومظاهراتهم هي مدبرة لإفساد مطالبهم حاجة زي كده في بالها !!!
مش كده وبس ده في إحتمال أكيد إنها تتكر في المستقبل وأنا متأكد من كده !
طيب ، في سؤال وجيه بيفرض نفسه ... إيه الأهداف من كل الكلام ده ؟ وليه الفتنه أو الوقيعة سواء طائفية أو فئوية أو شعبية بتحصل بالشكل ده ؟
الإجابة الأهداف كتير منها :
1- التأكيد على مسألة إن المظاهرات والاعتصامات والمسيرات بتضر بمصلحة البلد والاقتصاد والأمن القومي.
2- توصيل الشعب لحالة من الإنكسار واليأس والاستسلام مع الاحساس بالخوف من أن الاعتصامات او المسيرات هي شيئ مش هيوصل لحاجة إلا الفوضى ، بل وأن مطالب الناس المشروعة بحقوقها تتحول بالتدريج في نظر أغلبية الشعب إنها سبب إفساد الدولة سياسياً واقتصادياً وتعطيل المسيرة.
3- طبعاً كل ده في مصلحة الحرامية اللي بينهبوا البلد أو اللي بيساعدوا في تنفيذ مخططات الدول الأجنبية لضمان ان مصر تفضل ضعيفة ومتتقدمش خطوة واحده في طريق الإصلاح والنجاح وتفضل تحت سيطرتهم.
4- تشتيت المجلس العسكري ومجلس الوزراء وجعلهم عاجزين عن حل أي مشاكل اقتصادية وإشغالهم في الجانب الأمني ..
"ده على فرض ان المجلسين مش متواطئين وبينفذوا سياسات نظام مبارك ، أو على أحسن تقدير إنهم فاشلين أو عاجزين عن التعامل مع الأوضاع الأمنية والاقتصادية .. وغيرها"
5- إلهاء الناس في الصراعات والنزاعات و زرع الكراهية المتبادلة بين طوائف الشعب عشان يفضلوا تايهين عن النهب والفساد المستمر والمنظم يوم بعد يوم.
6- الفتنة الطائفية المفتعلة بتدي فرصة لأي دولة أجنبية التدخل في شؤون مصر أو الضغط عليها من منطلق حماية الأقليات "المسيحية" أو اتهام المصريين بالتعصب الديني وتشويه صورة مصر قدام العالم.
طيب .. الناس تتصرف إزاي علشان ده ميتكررش؟
في تصوري لابد من التنظيم .. ثم التنظيم .. ثم التنظيم بالإضافة للتأمين قبل أي شيئ :
- لابد من وضع خطة لتأمين أي مسيرة أو مظاهرة ، قبل الدعوة ليها أساساً وتحديد أشخاص بعينهم يكونوا قيادات معروفين بالإسم ونمر موبايلاتهم مع بعض مسئولين عن التأمين.
- الإتفاق على الهدف الرئيسي أو الأهداف أو المطالب اللي المسيرة خارجة على أساسها في نقط محدده ومرقمه 1،2،3 وعدم التغيير أو المطالبة بأي أهداف غيرها مهما حصل وأي شخص ينادي بأهداف أو مطالب غيرها يتم طرده بعيد عن المسيرة من أفراد اللجنة الشعبية اللي بتأمن المسيرة.
- لابد من تقسيم المسيرة أو المظاهرة لجماعات أو مجموعات كل منها له رقم ، كل مجموعة ليها قائد أو رئيس بينظم خط سيرها وتحركها ويضمن إن محدش يدخل في وسطيها "زي فرق الكشافة كده"
ولو فرض إن في أشخاص متضامنين مع المسيرة يتم عمل مجموعة جديدة خاصة بيهم علشان تستوعب تزايد الأعداد ولو فرض إن في منهم مندسين يتعرف مكانهم.
- لابد من تحديد مبادئ وقيم للمسيرة زي مثلاً :
محدش يحتك بحد .. محدش يشتم في حد .. محدش يخرب حاجة حد .. أي حد يشتمك متردش عليه.. إلخ .. وتبقى مهمة قيادات المجموعات التأكيد على الالتزام بالمبادئ دي.
- في حالة وجود عدد محدود من بلطجية مسلحين أو أمن عايزين يفرقوا الناس بالعافية ، طبعاً الناس هتجري بعيد علشان تهرب من الإصابة أو القتل ، لو الناس قدرت تمسك بلطجي منهم لازم يصوروه فيديو ويعرفوا منه جاي ليه ومين اللي باعته عشان يبقى دليل إدانة عليهم. وبعد ما الناس تتأكد إن الوضع أمان ومناسب ترجع تتجمع تاني بنفس الطريقة اللي اتجمعوا بيها في الأول.
- لو الوضع زاد سوء وأصبح مفيش مفر غير من الصدام والمواجهة مع شرطة أو جيش أو بلطجية ، يبقى لابد ساعتها من إنهاء المسيرة أو المظاهرة فوراً والانسحاب الكامل من المكان بأي شكل ، حفاظاً على الأرواح والممتلكات لأن المواجهة هتزيد الموقف سوء وكوارث زي ما حصل في ماسبيرو.
غير كده النار لما مبتلقيش حاجة تحرقها بتحرق نفسها وده اللي ممكن يحصل مع البلطجية والأمن لما يحتكوا بالمتظاهرين ، صحيح البلطجية والمأجورين وعناصر الأمن المتواطئة مربطين مع بعض ، لكن لو هم ملقوش الهدف اللي هم عايزنة ومخططين له بيتحقق ممكن يحصل لهم حاله من التخبط ويخبطوا في بعضهم
ومين عالم.. يمكن ربنا يضرب الظالمين بالظالمين ونخرج احنا سالمين.
ده إجتهاد فردي من وقائع حصلت قدامي أنا وغيري سواء في الشوارع أو تابعتها على الشاشات أو على الانترنت أو .. أو .. أو ، وبالتأكيد النتائج دي ممكن تكون افتراضات أو احتمالات ، وممكن تكون واقعية أو فيها مبالغة ، لكنها أكيد غير مستبعده.
والله أعلم .. يمكرون والله خير الماكرين
